北京不嬲都係我願望,今次學校組團去北京,真係難得,太好了!增廣見聞,擴闊視野!

 考慮到後果,所以在下會作出取捨,本篇章將不會將在下經歷全部寫出來,請見諒。

七月

四日 五日 六日 七日 八日 九日 十日

4-7-2001

  我呢世人搭過飛機幾次,都唔覺得有乜野特別,就算到呢一刻,我都唔覺得緊張,仲未執行李,又未買齊野,後日就飛啦,都唔知點算......

  睇過行程表一次,就覺得唔掂,三千三的旅行團,五日四夜,竟然早機去晚機返?仲要住五星級,真係咁抵?最弊都係早機去,要我七點半前就要到機場!

  諗返起幾年前,我同我老母加大佬去泰國,又係坐早機,又係要晨X早登記,就係果朝三點,天都未X光,應該係報紙佬都未訓醒,我就俾我老豆一腳伸醒左(都唔知佢癡左邊條線),跟住四條友好似走佬咁,五點就執晒細軟走落街搭的士,果陣天仲黑,成條街一個人都冇,的士站D的士佬見到我們,就識問:「係唔係去機場?」就係咁我們就坐(九龍)的士去機場啦,哈哈,點解去機場唔坐的呢?因為果陣要去啟德機場呀!真係懷念呀,架的士開到好X快,當然啦,咁X早,成條馬路一架車都冇,去到機場,乜人都未返工,人影都冇隻,真係唔明我老豆老母咁緊張做乜,累我們坐係機場,由五點坐到七點,唉。

  講返今次,七點半CHECK IN,成團人,得我一個住上水(其實仲有一個,不過.....),個個都搭E41,要我自己一個坐A43,好孤單哦∼好在A43快而準!唔駛我咁早起身,我預計六點就起身就差唔多,不過以我性格....

  到底跟住會發生咩事呢?

5-7-2001

  今日大半日都為北京團之後的廣西團作準備,因為行程緊密,在北京團回來後幾日,就要再飛去廣西,真係慘情,其實最惡劣的,就是現在天文台掛了八號風球,吹面狂落雨,風又大,可能影響到聽日的飛機,可惡,有生以來第一次渴望唔打風!

  我就唔驚風,只係怕人地驚,唔敢駕飛機,唔敢開巴士咁樣,一切,都睇個天啦!

  聽日出發!五日後見!

6-7-2001

  係今日上午五點幾,我老豆就一腳申醒我了,跟住我就開電視,點知八號風球沒有除下,而且雨不停的下。

  接到阿虎的電話後,我便到樓下乘阿虎的舅父的的去大埔。跟住我們在風雨下到達大埔。我、阿虎小儀阿JOHN分別上車後,便出發前往機場,雖然掛緊八號風球,但青馬大橋竟然唔開下面俾人行,真係仆街,係橋上行車,清楚地聽到風聲,在大嶼山,樹木被吹到變形,真係擔心飛機能否延遲。

  到達赤臘角後,已是七時多,已有數名團友到達了,跟住我們就看見領袖SIR,和導遊小姐,雖然我們事前要求旅行社派個美女導遊來,但事實上,慘不忍睹,真係一個美麗的騙局,我寧靜要個阿伯做導遊......

  係機場等左一個鐘,我地就入閘,但係入左閘無幾耐就要登機了,我地坐中國航空,九點半果班機,但係上機之後,就收到消息飛機要延遲起飛,耿係啦,咁鬼大雨大風。當時仲係八號風球,跟住坐係架飛機度呆等半粒鐘之後,飛機先肯郁,跟住,係滂沱大雨的情況下,一飛衝天。

  係飛機上面,冇野好做,我坐在飛機中間,又睇唔到風景,真係悶到要睇個電視既戲,其他人就訓晒,仲訓到隻豬咁,真係唔知有咩咁好訓!但如果唔訓,三個鐘真係好難捱。

  天空上面沒有雨,非常好天,就咁樣過左三個鐘,我們終於到達北京

  初時睇落個機場好似好殘,但係落機之後,就覺得完全係又新又靚,比想像中好!不能相信係大陸野,因為仲靚過赤臘角!原來只係兩張紙同一本回鄉証就入到境啦,方便過去其他地方。認完行李就可以步出機場,我們見到真正的北京導遊,之前阿SIR話係女的,我還抱有一絲希望,點知一見,又係超級失望,又瘦又白又靚(相反呀)!

  一行出機場,就覺得好熱,當時的氣溫是三十多度,但係又唔覺得好辛苦,原來北京天氣雖然炎熱,但係比較乾燥,所以我企左好耐都唔會流汗,爽!為左使讀者不混淆,所以以下稱香港導遊是「ADA」,北京導遊是「LAM」,而司機叫「」(雖然沒佢出場)。

  跟住我們上了一架旅遊巴,呢架野就係我們五日的車子了。上車後,LAM就開始講解。我留意到成條馬路都種埋一種樹,但係呢種樹沒有什麼美感可言,經導遊講解,果然如我所料,係用黎防禦沙漠化的。

  雖然條馬路係好直兼冇交通燈,但係都要行好耐,先至去到食飯的地方,呢個地方好似係一間研究院?我地入去食野,但係食的,都係粗茶淡飯,一枝可樂十一條友分,導遊話北京食物的特色是北京的鹽很平,所以廚師會整到D飯菜都好鹹,但唔知點解食極我都只係覺得好淡...好難食!

  食完飯後,我們目的地係北海公園,呢個名為北海公園的東西堶惘酗@座白塔,聽LAM講堶惘玲疇釋迦牟尼的舍利子,係唔係真我就唔知,只係知道我們沒機會上去呢座塔,因為LAM速速扯我們走去其他地方(景點),跟住就帶我們來看一塊乾隆題字的石,但甩左色,沒什麼特別,等我遲D寫D字係D石頭度等後人慢慢觀賞仲好啦!

  跟住,就行完個北海公園啦,真係快,不愧為走馬看花,跟住穿過一條里,到達景山公園,呢個公園最大特色,就係可以睇到大部份的北京城,同埋當年朝皇帝明思宗就係呢個公園度死。成個公園好大,但係LAM一下子就帶我們去到「最值得看的地方」!我們上到一座山的山頂,果然能夠飽覽北京的風光,北京真係又大又靚,又沒有山,和香港有很大的分別!同時我們可以清楚看見故宮博物院,呢座野好大,而且係橙色為主,都算係好靚!阿SIR話故宮的結構是有特色的,例如由矮至高咁,一看之下果然如他所說!明天就可以親身入去故宮了。

  看完風景,就看一棵樹。原來呢個景山係當年的煤山,傳說即係思宗暴屍的地方,後來俾狗改名做景山,而當年思宗暴屍地,現在成為遊客拍照的地方,真係慘。

  離開公園,又要上旅遊車,一個鐘車程,我們抵達一間飯店食晚飯,但都係冇野好食,我就索性唔食,留返D飯菜俾人食,廢事又俾人話我賤。

  食完呢餐,架車就車左我們去睇雜技,恕我無能,我睇到唔夠四分之一就訓著左,訓到完場,所以唔知發生左咩事。一出間表演場所,個天先至黑,原來北京係好夜先天黑(夏),但係北京人都沒有夜生活,D舖頭九點就收晒,D人又訓晒,唉!

  跟住就係坐住架車夜遊三里屯,呢個三里屯就係北京蘭桂坊,當年豆為兄丟野擲記者都係呢度發生。呢個三里屯有酒吧又有雞竇(聽講),LAM話叫一次雞要萬幾千幾,佢話首都係貴D架剌,真係搞錯。LAM唔俾我們落車睇,只可以係車到睇,但係,可以睇D咩呢?燈?人?客?十五分鐘不夠,就完成坐車看花,直接返酒店。

  我們五日四夜住的是華潤飯店,係四星級,聽落真係好巴閉,外型都幾大。一入酒店,ADA就沒收我們的回鄉証,都唔知有咩用。一上到房,就發覺四星級真係...,間房同其他地方的三星級沒分別,真係如SIR形容為金玉其外,連汽水機都冇.....

7-7-2001

  七點,我起身落飯店樓下食自助早餐,但成餐都淡而無味,粟米片、煎蛋也是淡的,最有味的,都只是水蜜桃。

  我們乘車到天安門廣場,我看見毛主席紀念堂有超勁多人排隊,原來係瞻仰主席的遺體,過左咁多年主席仍然受到咁多人崇拜,真係偉大,但我就唔想自己好似佢咁啦。

  跟住,見到天安門廣場了,真係好大,但同電視所見沒有什麼分別,座城樓比我想像中矮,個導遊放低我地影相,影完就穿過隧道到達天安門城下,進入故宮博物院後門(似乎係),呢個時候我先至知道天安門故宮的一部份,唉。

天安門城樓

  因為要走馬看花的關係,我們只能沿中間的路前進,即是直線穿過故宮,其他的不看。故宮紫禁城,屋頂以橙色為主,近看真的好美。進入故宮中間,看到龍椅,但因為俾人欄住,坐唔到上去,可惡。睇完咩殿乜殿,我們看鐘表館珍寶館,其中遊覽珍寶館時,佢話館內達地的地磚非常珍貴,唔想D磚俾遊客的鞋刮花,所以入親去都要買一個2RMB的鞋套套住對鞋先入得去,因為唔可以行其他路,所以挶住要買,我入到去之後,發覺佢只係擺D文物係館堶情A乘機掠奪一筆!中國人真係識呃遊客錢!

  行完故宮,就去食午餐,終於俾我食到一餐有味啦,但只係得小小辣@@。食完午餐,就去天壇啦!

  又係呃錢時間,估唔到D人將天壇分做幾個部份,入一個地方收一次錢,好在我們團費包埋..

  天壇北京標誌,非看不可,而我玩世紀帝國(Age of Empire)時已經覺得祈年殿好靚,想親身一看好耐,今日終於得償所願!當地被列為世界古蹟,但我唔知有咩作用。

  係天壇內,有圜(←環)丘,皇穹宇,祁年殿...好多好多部份組成,北京標誌只係祁年殿。而天壇可以話冇咩地方可以坐人,果日又曬得很厲害,所以都幾辛苦,但好在北京夠乾,三十多度都唔流汗∼

  如果唔知天壇建築設計的話,可以去看高級程度補充科目-中國語文及文化《中國藝術的基本精神》,堶惘頂廎埴茠漱雯苤G「天壇的建築及色彩的運用,使這座建築具有嚴肅、神聖和崇高的意境....」

  祈年殿就是天壇最壯的建築,堶惆S有橫樑,而每一條柱都有代表,春夏秋冬,十二個月,十二個時辰等,越睇越鐘意,真係型到死啦!!

天壇祁年殿

  依依不捨地離開天壇,架車車左我們去景泰藍廠參觀景泰藍製作過程,實際上係車我們去買野..景泰藍乃馳名中外的手工藝品,雖然我有睇過名字來源但係唔記得左,簡單黎講景泰藍係一D打唔爛的東西,類似瓷器鑲鐵咁。去到賣景泰藍的地方,就感受到呢樣手工的可怕之處-價錢!一個花樽仔都要兩舊幾RMB,最平果樣都過二十,仲只係的屎咁大(好細),真係掠水!但話晒呢間都係國家指定認可的工廠,點會賣假野呢,於是我就忍痛花了三十八RMB買了一條景泰藍魚,又係好細,其實呢件已經係我咁多件手信之中最貴既一件啦!!

8-7-2001

   第三日,早餐又係食自助,仲要同琴日果D野食一模一樣,慘。

  食完野之後,就坐車去長城了,坐左足足成個鐘車(大直路都要一個鐘),就去到一個叫八達嶺的地方,果度係長城其中一部份,根據導遊所說,呢部份長城朝所建,不是,可惜。

  一落車,就見到長城上有好鬼多人,單色的城多了很多顏色的衣服,很有趣。導遊放人自由後,便上了去。而我也不跟隨大隊,自己一個人跑上去,可是長城有地方窄,有地方闊,窄的地方只夠兩個人上落,果陣仲要有好多人一齊上落,逼到爆,我只能又上又停,但上到一半時,我仍然見唔到導遊LAM們,難道他們老多益壯咁快上左去?當時因為已經很高,大部份遊客都累到標汗而陣亡,只能停在烽火台內休息,所以越高的地方,就越少人,而且越易行,我就一路上一路上,唔休息唔影相,終於用左半個鐘,就上到最頂了。

  上到去,睇唔見我學校D人,又睇唔見導遊LAM等,唉,大概我係第一個到達了。登上烽火台,看見很壯觀的景色,雖然唔係山的最高,但都有一種傲視世界的感覺,又感到前人的偉大,竟然能再這麼高的地方一塊塊磚地建築,仲要建到咁長,真係中國的驕傲。

  等左半個鐘,正當我要落去時,先有我團的人上到來,原來是F4的,仲勁過F6,好野!大家影下相就返落去,係我又要落去果陣F6果D先上到黎,唉。

  晏晝食餃子宴,非常好食,但跟住導遊帶左我們去賣玉的地方雕塗橡,但係好貴,牙籤咁大個橡都要差唔多成舊水,個玉璽大小的仲要五位數字,真係買唔落手,但偏偏有同學雕,仲要雕好多個,唉。

  下午,去明十三陵定陵地下宮殿,定陵是萬歷皇帝的陵墓,是在位最長的皇帝,陵墓也是最大的,而且是唯一俾後人開過的。入去地底,竟然要排隊,很奇怪中國都有人排隊。一路要沿著樓梯落到唔知幾多米,只記得是很多層,落到最底,只有微弱的燈光,又濕又冷,一片恐怖的氣氛,好在超多人,唔驚!在陵內只見到棺材同陪葬品,見唔到萬歷條屍,最正就係見到條友開鑿呢個陵真係夠豪,咁深都挖到,勁!

  跟住去藥廠..呢個遲D先講。

9-7-2001

  已經係第四日,早餐仲係要食自助,真係奪命!

  第一個到的地方係北京大學。我們由求知路進入,一入去就見到大學圖書館,真係好靚,但係因為某些原因,所以唔入得去。之後導遊帶我們係大學堶掖}逛,去到一間賣衫的舖頭,見到北京大學的衫,D團友就餓虎撲兔的上前搶購,而我就選擇三件印有「PKU」(PEKING U)字樣的衫,係香港著相信會...北京大學真的又寧靜又大,又有蓮花池,又有籃球場,真係正到爆,唔係精英中的精英中的精英都唔會入去讀!

  午餐後,我們到頤和園去。呢個頤和園都幾大,整個假西湖都幾落本,一入園,就登上一條超樣衰的船,話要乘船遊覽昆明湖。話說當日天陰陰,沒太陽,仲有落雨添,係船上面睇風景都唔係太靚,不過都算係咁啦。坐左一陣就落船,之後個個都走去買野,沒人理導遊..接著我們穿過世界最長的廊,條廊上面畫左好多公仔,又係落本之作。跟住睇下慈禧太后間屋,沒什麼特別,睇戲成日見,又睇下D敗家石,光緒皇帝被軟禁處,D屋都幾靚。頤和園真係又大又靚,唔怪得要咁多錢起啦!哈哈!

  跟住我們又去睇圓明園,呢個園係俾外國佬破壞的園,聽講未俾人燒果陣超靚,歐陸特色咁話。我們入到去,見到一個大坑,睇返D圖先知呢個坑以前係湖。跟住我們就見到中史書果幅圖,一座左右對稱的爛石,但爛石都有好多人影相,真廢解,我又睇下D「未破壞圖」,覺得呢舊爛石以前都好靚,點解會變成咁呢,國恥呀!

  晚飯後,我們去夜遊東華門。呢度係北京的小食街,乜野特色小食都有,就我所見,有燒羊肉,牛肉,炸雪糕,添品等,特別的有田雞串燒,淡水龍蝦串燒,蠶繭串燒,蠍子串燒,草蜢串燒等,種類之多不能盡錄!其中炸草蜢果陣,D翼呀腳呀散晒出黎,非常恐怖,但都有團友食!勁!我就唔啦!

  跟住夜遊天安門,但係夜晚天安門唔俾人停車,所以我們只能乘車經過,呢個真係一個充滿回憶的地方。

10-7-2001

  早餐,最後一次,都係食自助,唉,算啦,反正係最後一日。

  執齊野,就離開華潤飯店,其實我唔捨得呢間野,話晒都住左四晚,有感情(哈)。最後一日行程就係去王府井大街,相信有留意新聞的朋友都知道呢條街係乜,呢條街算係俾遊客晒錢用,我地入到一個多層商場,同香港果D差唔多咁靚,所以大家只係買D「北京特產」茯苓夾餅。行出商場,去到一條沒遮沒冷氣的街,又係賣遊客野,不過搞笑的係呢條街有得講價,呢個遲下再講。

  離開王府井大街,去食午餐,點不知間野的服務非常差,真係XXXX!之後就坐車去北京機場,又要和LAM說再見,唔知點解呢幾日都不太喜歡她,但呢刻又有D唔捨得,唉,估唔到之後..(廣西篇)

  係機場,我作出北京最後購物,60RMB一隻熊貓公仔,不過死都唔送俾人!因為我喜歡!哈哈!

  北京,要講再見啦!我十分喜歡北京,和今次行程!

  三個鐘的飛機航行時間,我又係訓唔著,因為出面風景太靚,黃昏加橙色雲海,太美了!有咁靚的風景唔去好好欣賞,用晒D時間去鋤D,真係浪費!

  著陸了,旅程結束,真係非常非常唔捨得!....

 如果北京團友知道我寫漏左D乜想我補充,歡迎告訴我!

 

馬後砲-旅行小記

求財不要命

話說我們成團人在八號風球的情況下要在朝早趕到機場,但係風大雨大,有邊個的士佬為了兩餐而出來搏命呢?好幸運地我們四人幫有阿虎的健談舅父載我們去機場,但係其他團友就...聽曾Sir講,佢搭的士搭左五百蚊!個的士佬駛到青馬大橋果陣,架的士俾風吹到打橫跌落海!的士佬要拗晒身扭盡個鈦盤先無事,真驚險!你話如果俾左我做的士佬,經濟好果陣我駛鬼係八號風球出黎做咁搏命?都係香港政府的錯!哈哈!

美麗的騙局

上文提到旅行社派左隻豬扒搭阿婆的醄導遊組合俾我地。呢個豬扒導遊Ada去到北京之後,就將講解的工作俾左阿婆做,個阿婆係度講解,豬扒就係度講電話,行到邊講到邊,唔講電話,就一個人係度自閉!所以,我們團員沒有人肯和她們合照,所以現在沒辦法登上兩位的樣子和大家分享。話雖如此,但阿婆都算唔錯,識講廣東話∼

靈異還是奇怪?

一行人到大陸逛,人生路不熟,有好多野都唔識,所以常常發現大陸有好多怪野,就好似係頤和園的入口,就有一個奇怪的告示牌,寫住唔俾遊客帶西瓜進入,我就唔知點解,於是我就同呢塊野合照,俾大家欣賞一下,如果知道點解,告訴我呀!

史伐龍(不是幽靈)

大陸好過香港!!

大陸到底有咩好過香港?就係單車路!係北京桂林旅行中,我都留意到大陸單車路好靚,不愧為單車皇國,香港D單車路就好差,起好之後就完全唔補養,踩到我D車虧晒,路政署應俾人砲轟!

講價

係大陸買野雖然係好平,但係D大陸小販店主等都喜歡將價錢托到好鬼好,如果佢賣你三百蚊,咁呢件野就應該講到一百蚊先好。

話說我們係最後一日去到北京王府井大街,有一條專賣紀念品的街,我們看見自己喜歡的物品時,便會問價,但第一個答覆是極貴的,如果你唔肯買,老闆就會降價,而你就可以講價,隨時有意外之驚喜。

我們團中有個名人「蔡X俊」,指住一件東西聲稱想買,老闆就開價80,於是基於原價除三原則,呢位蔡同學就壓到50,甚至更低,當大家為他壓到得返40而稱奇時,佢仲未滿足,他說:「太貴啦,不買啦!」掉頭走,老闆話:「好啦30就30啦」呢位蔡同學就返轉頭豎起手指:「15」老闆俾佢吹脹晒,知佢根本就係玩野,唔理佢。

藥廠事件

上文提過有一日我們俾導遊帶左去一間藥廠,走入去聽下間野推銷。數十人入到一間房,看見講台有個正在燃燒的爐,正在火燒一碌野(好似係金屬),另人百思不得其解,跟住又條友就開始推銷間藥廠之產品,係一隻藥膏

佢當然講到隻藥乜都醫到啦,又話消暗瘡又話美顏,乜都有,最特別係對付燙傷咁話。講講下,條友就話要用事實証明呢隻藥之神效,於是拿起果碌燒紅左的野,佢就話:「等我用呢碌野燙傷我隻手,然後搽下隻藥,俾你們見識呢隻藥之神效啦!」

哇我心諗,碌野岩岩燒完,慶過捺雞,隊落隻手度...條友為左証明自己果碌野的高溫程度,便拿一張廁紙來實驗,結果張紙稍為接觸碌野,已經著火變成灰燼!哇!碌野咁X熱,唔好話捺人,殺人都得呀!如果真係隊落隻手到,隻手仲駛要?但條友就好胸有成竹話無事,跟住講左兩句:「真係要我表演?」「我來也...」

我心想,你隻藥咁撚堅?搽左一陣就無事?佢真係捺落去,我就幫襯佢!點不知曾SIR唔想晒氣,叫佢唔好捺,跟住條友耿係放低碌野算數啦!原來佢跟本就唔會做,超!

結果成團只得一個人買佢隻藥(點解唔請佢食白果呀?!),講左咁多廢話做左咁多無聊野,條友真抵死。

 

補充資料:

1.部份登場人物(排名不分先後)

史伐龍 主角,笑傲人世,目空一切。興趣是雲遊四海,能與景物感通,達至天人合一之超脫境界。中史組之一。
曾Sir 北京團的領團老師,任教中國歷史,目標是帶領中史組在高級程度會考奪取100%合格率。
黎Sir 北京團的隨團老師,任教世界歷史,三十二歲還登上長城最高點之精神使作者難忘。
Miss李 北京團的領團老師,任教中國歷史,將會繼曾Sir之後帶領來年之中六中史組。
小儀 人稱小儀,是♂,是一個好好先生,北京旅中與龍同房,中史組之一。
阿虎 阿虎-人稱肥仔俊,偶像係劉德華,興趣係扮阿虎。搞笑人物之一。
John 原名鎮江,基督徒,理科生,不是中史組。搞笑人物之一。
蔡X俊 為人風流,擅長係作大,中史組之一,成績中史組第一。與天恩合稱TWINS。
天恩 也是♂,沉默寡言,一開口就一矢中的。與蔡X俊合稱TWINS。中史組之一
魚尾 ♀,「楊貴妃再世」,中史組之一
阿菲 ♀,自稱靚女,真可憐,中史組之一,成績與蔡有得揮。
Karen ♀,乜都驚餐死,中史組之一
一班同學 同校低年級同學,中四至中五都有,也是北京團團友之一。
Ada 女導遊,興趣是傾電話。
Lam 住在北京團的女導遊。

2.行程簡表

七月六日 七月七日 七月八日 七月九日 七月十日
早機直達北京 天安門廣場 八達嶺長城 北京大學 王府井大街
北海公園 故宮博物院 餃子宴 頤和園 晚機直達香港
景山公園 天壇 明十三陵定陵 昆明湖  
雜技欣賞 景泰藍廠 藥廠 圓明園  
夜遊三里屯     夜遊東華門  
華潤飯店     夜遊天安門